सक्दिन म !!

आकाशको तारा टिपी ल्याउन सक्दिन म
तिम्रो लागि सुनको छानो छाउन सक्दिन म।

आश्वासन मात्र दिई कसरी म ढाँटु?

सारा संसार बिर्सिएर आउन सक्दिन म॥

अन्धकार र उज्यालो त प्रकृतिको रीत हो

औँशीलाई पूर्णीमा मा ढाल्न सक्दिन म।

सामर्थ्य नै छैन मेरो झुटो कुरो बोली

तिम्रो सामु आफैलाई खसाल्न सक्दिन म॥

माया गर्छु भन्छौ फेरी शर्त किन ल्यायौ?

तिम्रो लागि आफैलाई फेर्न सक्दिन म।

यथार्थलाई लत्याएर के पो पाउँछौ तिमी?

तिमी यती बदलिएको हेर्न सक्दिन म॥

प्राप्ति हो समर्पण हो त्याग पो हो माया

तिम्रै शर्तको भरमा माया साट्न सक्दिन म।

तिमी प्रति मेरो सम्मान अझ बाँकी नै छ

मित्रताको कसी अहिल्यै काट्न सक्दिन म॥

सम्झौतामा माया प्रिती कसरी म गासूँ?

आफ्नो स्वाभिमानलाई अहिल्यै भुल्न सक्दिन म।

अन्यौलताको भुमरीमा किन बाँध्छौ मलाई?
झुटो बाचा गरी तिमीलाई छल्न सक्दिन म॥

तिमी आफैँ स्वतन्त्र छौ मैले के पो भनूँ?

निशर्त तिमी माया लगाउ अब भन्दिन म।

साँचो माया भए आउ ढोका बन्द छैन

तर अडान बाँकि भए सुन्न सक्दिन म॥

सम्झनाको चिनो बोकी बाँच्छु तिम्रै यादमा

तिम्रो तस्विर च्यातेर फ्याँक्न सक्दिन म।

जीवन पछि मृत्यु आउँछ प्रकृतिको रीत हो

तर तिमीलाई दोषी बनाई प्राण त्याग्दिन म॥

आज!! (Today)

कताकता तिमीलाई नै भेटौँ भयो आज
दु:खसुख तिमीसँगै साटौँ भयो आज
चकमन्न रातको यो एक्लोपनले हो की?
तिम्रै यादमा कसरी रात काटौँ भयो आज॥

बिथोलिन्छ निन्द्रा किन? यादले पो हो की?
छट्पटाउँदै कोल्टो कत्ती फेरौँ भयो आज।
तस्विर मात्रै हेरी बस्ने धैर्य छैन अब,
आफ्नै सामु राखी तिमीलाइ हेरौँ भयो आज

रुमलिन्छ मन किन कताकता मेरो

एक्लै जिउने प्रण पनि त्यागौँ भयो आज

आस्थाको धरोहर त्यो मन्दिरमा ढोगी
देवी-देवता भाकी तिमीलाई मागौँ भयो आज॥

धेरै भयो नदेखेको कस्ती भयौ कुन्नि?
भेटघाट गर्न यतैतिर डाकौ भयो आज
अत्तालिन्छ मन कतै गलत सोच्ने हो की?
प्रेम प्रस्ताव तिमीसँगै राखौँ भयो आज॥

दुई हजार तेह्र सालमा

न त बाँझो खेतबारीमा धानमकै फल्छ भोलि
न त सस्तो ईन्धनले नै मोटर गाडी चल्छ भोलि
अनि नयाँ के होला त दुई हजार तेह्र सालमा
न त बिना लोडसेडिङ रातभर बत्ति बल्छ भोलि

बगाउनै छ पसिना त जनताले हर सालमा
जति शरिर गल्छ आज उत्तिनै गल्छ भोलि
के छ त खै आशा राख्ने दुई हजार तेह्र सालमा?
न यो भ्रटाचारी देशको समस्या नै टल्छ भोलि 

अवस्था यस्तै रहे देशमा अशान्तिको, 

हत्या हिँसा काटमारले मुलुक अझै जल्छ भोलि
परिवर्तन के होला र दुई हजार तेह्र सालमा?
राष्ट्रिय मुद्दा बेरोजगारको न त कुनै हल छ भोलि

छुँदैछ चन्द्रमा नै मुल्यबृद्धि महँगीले,
यस्तै रहे गरिवीले जीउ ज्यान ढल्छ भोलि
के खुशीमा मनाउनु खै दुई हजार तेह्र साल यो
न त कुनै नव अवसर न खुशीको पल छ भोलि..

,